KRALENDIJK – Djamars mainta, prensa lokal tabata tin e oportunidat pa mira tras di kòrtina na Aeropuerto Flamingo, kaminda ta trahando duro pa instalá un bant nobo pa entrega di maleta na e pasahero.

Segun direktor Maarten van der Scheer, e sistema anterior mester a wòrdu reemplasá pa dos motibu: E instalashon ya tabata hopi bieu, pero tambe ela bira hopi chikí pa satisfase e demanda ku a krese. Partikularmente den wikent ora tin 3 kompania merkikano ta baha tras di otro, e espasio i sistema anterior tabata muchu chikutu. Pero tambe ora KLM ku TUI yega huntu, tabata sòru pa basta kongestion. 

Aunque gerensia di BIA no ker a menshoná un suma eksakto di e invershon, ta asigurá ku ta trata na algún shenmil florin. 

E proyekto ta planeá pa tuma mas o ménos kuater siman, di kua mitar a pasa kaba. Un ekipo for di Kanada ta instalá e bant nobo den sala di yegada. E bant nobo lo ta 10 meter mas largu ku esun anterior. Segun Van der Scheer, esaki lo tin un impakto grandi. “No ta trata solamente di e parti ku ta bisto pa pasaheronan, pero tambe e parti ku no ta visto pa pasaehro. Pa motibu di mas espasio, e maletanan por wòrdu poné mas rápidamente riba e bant, pero e pasahero tambe por kue esaki mas fásilmenti i pa e motibu ei, mas lihé. Esaki lo kondusé na un mihó fluho di pasahero”.

Komprenshon

Ounke ku e instalashon di e sistema nobo ta kausa algun inkomodidat temporal, mayoria di pasaheronan ta reakshoná ku komprenshon òf entusiasmo. “Nos a opta pa no pone barera hopi haltu na luga di trabou, asina pasaheronan ku ta yega por mira e progreso k unan mes wowo,” asina Van der Scheer a bisa.

Gregorio Matthew, Duty Station Manager, a menshoná ku a tuma personal adishonal pa dirigí e kambio temporal den fluho di pasaheronan. “Nos a kontratá hende adishonal for di afó, pero tambe tin por ehèmpel empleadonan di nos ofisinanan di BIAku  ta yuda pafor di orarionan di trabou regular,” Matthew a spiká.

Entusiasmá

Van der Scheer ta bisa di ta entusiasmá ku e kambionan ku ta na kaminda. “Esaki ta solamente e komienso di vários mehorashonan riba kua nos ta trahando. Lo tin mehor fasilidatnan pa aduana. I despues di e kontrol di aduana, lo nos traha pa mehorá banjernan i renobá área di restorant. E trabounan den e fase aki lo tuma un total di mas o ménos diezocho luna.”