KRALENDIJK- Entrante djamars 11 di yüli, entrada di e ‘intake-balie’ di warda di polis na Playa ta muda temporalmente en konekshon ku mantenshon den e edifisio. 

Kuerpo Polisial Hulanda Karibense (KPCN) i ‘Rijksvastgoedbedrijf’ (RVB), ta trahando un tempu kaba na medidanan pa mehorá e klima den warda di polis na Playa. E intenshon ta pa mehorá e kalidat di aire den e edifisio pa e seguridat i bienestar di e trahadónan. Pa implementá e medidanan aki na un manera seif pa tur trahadó di e kuerpo, a muda temporalmente algun ofisina den e edifisio pa un otro sitio den e edifisio.

Ta importante prinsipalmente pa e públiko sa, ku e entrada di e ‘intake-balie’ a bai awor na un porta mas smal na banda drechi di e edifisio na altura di e ‘slagboom’. Tin un bèl na e porta ku bishitantenan por primi pa drenta paden. 

Unabes den e edifisio, e bishitante tin un espasio di espera ku nan por sinta miéntras nan ta warda riba yudansa. Mas aleu, mantenshon di e edifisio lo no stroba ningun servisio di polis.