KRALENDIJK – Fin di yüni Bonaire International Airport (BIA) a risibí, pa di sinku bia konsekutivo, e sertifikado di siguridat importante di Inspekshon di Ambiente di Bida i Transporte (ILT), atrobe pa un periodo di 3 aña. Ku esaki BIA, komo operadó di Aeropuerto Flamingo, a bolbe keda sertifiká konforme e legislashon di aviashon vigente (Besluit Toezicht Luchtvaart BES), pa e echo ku e tin i ta mantené un operashon di aeropuerto sigur.

BIA segun lei, tin e obligashon di disponé di entre otro un sistema di maneho di siguridat adekuado i un manual pa tereno di aeropuerto ku proseduranan. ILT, ku ta kai bou di Ministerio di Infrastruktura i Maneho di Awa, a hasi un ouditoria profundo na yüni. Pa esaki a analisá entre otro e sistema di maneho di siguridat, formashon i entrenamentu, método di traha i prosesonan i si ta kumpli ku tur lei  i regulashon. E investigashon a indiká ku BIA ta kumpli ampliamente ku e kondishonnan di siguridat stipulá. 

Onno de Jong, direktor operashonal (COO) di BIA, ta bisa: “E ta demostrá ku e tim di aeropuerto tin atenshon kontinuo pa siguridat na Aeropuerto Flamingo.” BIA a usa e tempu ku a transkurí prinsipalmente pa sigui profeshonalisá e organisashon i mehorá mantenshon ainda mas. “Siguridat ta kuminsá ku un bon mentalidat, unda e enfoke ta pa nos keda siña i mehorá siguridat kontinuamente. Esei nos a sa di logra huntu ku otro atrobe. Mi kòmplimènt na e tantísimo koleganan ku ya pa añanan ta traha pa logra esaki.”