WILLEMSTAD – E kantidat di bishitantenan pa Kòrsou a baha e aña aki te ku awor ku 21 porshento. E kantidat di kasi 108 mil bishitante den e promé lunanan di 2022 a baha te 85 mil den e promé sinku lunanan di e aña aki, asina CHATA, e asosiashon di e sektor hospitalario, ta informá

Kòrsou no ta e úniko destinashon di distansha largu kaminda e kantidat di bishitante for di Hulanda a baha e aña aki. Aruba a mira un bahada di mas ku 22 porshento di turista for di Hulanda den e promé sinku lunanan di 2023, mientras e kantidat di bishitante Hulandes ku a bai Repúblika Dominikana tambe a baha ku 15 porshento den e promé sinku lunanan di 2023. Mexico a nota un bahada di nuebe porshento di bishitante for di Hulanda te ku april di 2023, kompará ku e mésun kuater lunanan den 2022.

Segun CHATA e Hulandesnan no a stòp di biaha. E kantidat di bishitante ku a bai Gresia for di Hulanda a dòbel den e promé tres lunanan di 2023 kompará ku e mésun tres lunanan di 2022, mientras e kantidat di bishitante pa Spaña a krese ku mas ku tres porshentu.

I dos destinashon spesial pa destinashanan largu a konosé e aña aki un kresementu den e tráfiko Hulandes: e kantidat di bishitante for di Hulanda pa Costa Rica a krese kasi un kuart den e promé sinku lunanan di 2023 kompará ku e mésun sinku lunanan di 2022 i e kantidat di biahero pa Malediven tambe a subi ku kasi djesdos porshento den e promé sinku lunanan di 2023, ounke e kantidat ta relativamente chikí ainda.