RIJSWIJK – Próksimo wenter TUI lo bula ku ménos buelo pa Boneiru. For di 30 di òktober lo no bula Kralendijk mas tur dia for di Amsterdam, sino sinku biaha pa siman. Ta eliminá e buelo di djaweps i djadumingu. E buelo ta bai awor tres biaha pa siman nòn-stòp riba djamars, djabièrnè i djasabra.

No ta redusí e kantidat di stul, segun Rick van der Pluijm, direktor di TUI Dutch Carribean. “E ta asta subi un tiki. Di pursi nos a plania mas stul pa Boneiru pa kada buelo e próksimo wenter.”

TUI ta saka e stulnan ekstra di un otro repartishon di e buelonan kombiná pa otro destinashonnan den Karibe.

Te ku awor aki e biahe di regreso di aeropuerto Flamingo pa Amsterdam ta shete biaha pa siman dirèkt. Esei ta bira den wenter dos biaha pa siman nòn-stòp riba djaluna i djarason  i via Kòrsou riba djamars, djabièrnè i djasabra. Ta realisá e buelonan ku un Boeing 787 Dreamliner.

Aruba

Na Aruba tambe ta kambia e skema di bula. TUI ta sigui bula méskos ku awor tres biaha pa siman, pero e buelo di djasabra ta kambia pa djadumingu. E buelo aki i e buelo di djaluna lo ta nòn-stòp. E buelo di djaweps ta bai via Kòrsou.

E biahe di regreso di Oranjestad pa Amsterdam tabata semper nòn-stòp riba djaweps, riba djasabra via Boneiru i riba djaluna via Kòrsou. For di 30 di òktober e buelo di djaweps ta bai dirèkt i e dos otro buelonan via Kòrsou.

Kòrsou 

For di 30 di òktober TUI ta bula tur dia dos biaha pa Kòrsou. Tres buelo aserka ku ta bira na tur djeskuater buelo. Awor e aerolínea ta bula solamente riba djaluna, djamars, djaweps i djabièrnè ku dos avion.

En todo kaso di e dos buelonan ta bai tur dia un buelo nòn-stòp Kòrsou, e di dos buelo ta bai via Aruba, Boneiru of Punta Cana na Repúblika Dominikana. Esun ku ke bula nòn-stòp mester paga bon tino na momentu di hasi reservashon.

Personal di kabina

Pa realisá tur buelo TUI a reklutá resientemente djesocho personal di kabina lokal nobo. Banda di Hulandes tur ta papia Papiamentu tambe.

Ku e koleganan nobo aki TUI tin mientrastantu un grupo di alrededor di sesenta personal di kabina lokal ku e por uza spesial riba e ruta di e islanan ABC.