KRALENDIJK – KLM ta bai mehorá su buelonan ku Boeing 777 pa e islanan, entre kua Boneiru, introdusiendo un Premium Comfort Class i un Business Class renobá. Despues di e aktualisashon éksitoso di tur e avionnan 787 pa Premium Comfort, KLM ta kambia su atenshon awor pa e flota di Boeing 777. E promé ‘Triple Seven’, e PH-BVA ‘Orange Pride’ ta ekipá kaba ku e Premium Comfort Class nobo, Luchtvaartnieuws.nl ta informá.

KLM tabata lat ku introdukshon di un Premium Economy Class kompará ku otro aerolíneanan. Pero fin di ougùstùs di aña pasá a tuma e promé Boeing ku e kategoria nobo aki den servisio.

Pasaheronan a risibí e Premium Comfort Class bon. Nan ta apresia mashá e servisio mehorá, e espasio èkstra pa pia (38 inch) i e stul hanchu, kompará ku e Premium Economy Class di otro aerolíneanan, Luchtvaartnieuws ta skirbi.