MONTGOMERY – Hustisia na e estado Merikano Alabama ta hibando negosashonnan sekreto ku e abogadonan di Joran van der Sloot tokante un akuerdo den e kaso di Natalee Holloway. Esei De Telegraaf ta informá a base di fuentenan serka di e investigashon. E aporte di e asina yamá akuerdo ku fiskal ta un testimonio total di Van der Sloot di loke el a hasi ku Natalee Holloway na 2005 i di e ekstorshon di su famia na 2010.

E Hulandes, ku Peru a entregá na Estados Unido na luna di yüni, lo a haña un kastigu mas abou en kambio di un testimonio. Ora sera e akuerdo, lo no bini un huisio ku hurado. Parti di e akuerdo ta ku Van der Sloot ta hasi un tèst ku un detektor di mentira. Ounke e resultadonan di tal tèst no ta forma un prueba hurídiko, nan ta duna si un indikashon di e balides di deklarashonnan i posibel testimonio di Van der Sloot, segun Ministerio Públiko di Alabama.

Den un entrevista ku De Telegraaf for di prizòn na Alabama, kaminda e Hulandes di 35 aña ta será for di luna di yüni, Van der Sloot ta bisa ku e no ta fèrwagt ku lo e sali liber nunka mas. “Frankamente bisá mi ta kere ku mi no ta sali liber nunka mas. Tur esaki ta debí na mi mes”, segun e sospechoso prinsipal den e kaso di desaparishon di e Merikano Natalee Holloway.

Van der Sloot ta sinta un kastigu di 28 aña pa asesinato di Stephany Flores na 2010. Peru a ekstradit’é pa Estados Unido, kaminda a akus’é di froude i ekstorshon di famia Holloway. Natalee Holloway a disparsé na aña 2005 na Aruba i no a haña su kurpa nunka.

Van der Sloot ta spera ku ta kaba lihé ku e kaso i ku e por bai bèk Peru. “Mi abogadonan ta den kòmbersashon ku Ministerio Públiko riba loke ta sigui sosodé. Mi ta spera ku ta atendé tur esaki lihé i ku mi por bai bèk Peru. E kondishonnan den prizòn Challapalca no ta agradabel tampoko, pero einan mi no ta isolá asina manera aki i en todo kaso mi ta mas serka di mi yu muhé Dushi i su mama Leidy”, segun Van der Sloot ta deklará na De Telegraaf.