BIRMINGHAM – Un wes federal a bai di akuerdo pa posponé e kaso hudisial kontra e Rubiano Joran van der Sloot te mas lat e aña aki. Asina su defensa ta haña mas tempu pa prepará e kaso di ekstorshon. E wes a disidí esaki ayera mainta durante e huisio.

Outoridatnan Merikano ta akusá Van der Sloot di a purba ekstorshoná sèn di famia di Natalee Holloway, e hende muhé Merikano ku a disparsé na Aruba na 2005 i kaminda Van der Sloot tabata embolbí.

E huisio tabata planiá originalmente pa djaluna 18 di sèptèmber, awor esei ta bira 4 di dezèmber próksimo.

Aktualmente Van der Sloot ta na Estados Unido despues ku Peru a ekstradit’é na luna di yüli último. Ora ku e kaso di ekstorshon ta finalisá, e mester bai Peru bèk pa sigui sinta su kastigu pa e asesinato riba e Peruano Stephany Flores na 2010.