KRALENDIJK – Den oranan trempan di mainta riba djaluna 8 di aprel, Wardakosta Karibe Hulandes a interseptá un boto na parti nòrt-òst di Boneiru. 

Djadumingu anochi e Sentro Operashonal Marítimo (MOC) di Wardakosta a risibí notifikashon tokante un boto ku tabata drif riba laman dor ku su motor a daña. A konsekuensia di esaki a desplegá e avion ‘Dash’ di Wardakosta pa lokalisá e boto, despues di kua a manda e ‘cutter’ Jaguar di Wardakosta pa ehekutá e akshon di reskate. 

Durante e akshon di reskate di e tres personanan abordo, a topa tambe ku supstansianan probablemente narkótiko. Despues di investigashon mas aleu a konstatá ku enberdat ta trata di supstansianan narkótiko. 

Detenshon

A detené tur tripulante, tres hòmber prosedente di Venezuela, di inisial S.D.V.R.A. di 34 aña di edat, Y.R.C. di 38 aña di edat i G.J.I.M. di 36 aña di edat pa transporte di droga. A entregá e sospechosonan i e supstansianan konfiská na Kuerpo Polisial Hulanda Karibense pa mas investigashon, ku eksepshon di e boto ku durante transporte a senk pa motibu di laman brutu. Entretantu a destruí e supstansianan narkótiko.