KRALENDIJK – Djaweps, Justitiële Inrichting Caribische Nederland (JICN) a organisá un merkado di informashon tokante e tema di detenshon i reintegrashon.

E evento a reuni un variedat di profesionalnan ku e meta di kompartí konosementu, traha red i promové reintegrashon eksitoso den komunidat pa e personanan ku a keda detení anteriormente.

Segun e organisadónan, e merkado di informashon a brinda un plataforma pa interkambio di ekspertisio i diskushon di temanan importante, ku ta bai for di prosedimentunan di detenshon te kuido despues di e periodo di detenshon.

JICN ta enfatisá e importansia di kolaborashon entre partner den detenshon i reintegrashon i e komunidat mas amplio pa duna oportunidat na e personanan ku a keda detené anteriormente pa reintegrá eksitosamente.

Gratitut

JICN a ekspresá gratitut na tur partisipante i partnernan den e kadena pa nan kontribushon na e eksito di e evento.