KRALENDIJK – Riba djaweps 18 di aprel último Korte Komun di Hustisia na Boneiru a dikta sentensia relashoná ku benta di mariwana dor di un sospechoso. Hues a laga e sospechoso liber pa motibu ku den artíkulo 4 den lei di Opio 1960 BES no ta para ku benta di mariwana no ta permití. 

Djabièrnè 19 di aprel Extra Boneriano a publiká e artíkulo i a trese dilanti ku aparentemente ta trata di ousensia den lei. Ministerio Públiko lo apelá veredikto di Korte Komun di Hustisia pa motibu ku no ta kompartí opinion di e hues.

Hustamente den artíkulo 4 di Lei di Opio 1960 BES benta di mariwana no ta nombrá komo un echo kastigabel. Ku e ta un echo kastigabel por haña esaki den artíkulo 3, insiso 1 bou di F. Den e artíkulo aki ta hasi referensia na un sup-areglo den lei. E areglo aki, areglo di 6 di yanüari 2005 pa ehekutá artíkulo 3, insiso 1 bou di F, Lei di Opio 1960 BES ta nombra mariwana i hash. 

Inkorekto

Den artíkulo 3 di Lei di Opio bou di B ta denominá benta di supstansia den e areglo komo kastigabel. E sentensia di hues di 18 di aprel na opinion di Ministerio Públiko no ta korekto. Benta di mariwana na Boneiru sin duda tabata i ta kastigabel.