WILLEMSTAD – Ta bini spit atrobe den e proyekto tan sperá Chobolobo Plaza, ku ta primintí di bira un sentro komersial nobo i ámplio, despues ku a desmantelá e último parti di e sentro komersial bieu na Schottegatweg Oost. E proyekto aki di Taubco Management bv, ku originalmente a anunsiá na yüli 2017, a keda drumi pa añanan largu, pero ta mustra awor señalnan di adelanto.

Kasi shete aña despues di e promé anunsio via un bòrchi di propaganda, a finalisá e desmantelashon di e anterior kompleho di pakus, kaminda antes entre otro Samson tabata ubiká. Esaki ta marka un fase nobo den desaroyo di e Chobolobo Plaza ambisioso, ku ta ekstendé te patras di e kompleho bieu na Lánthùis Chobolobo.

Informashon tokante e progreso di e proyekto ta keda skars; direktor Irwin Tauber resientemente no a kompartí detayenan nobo tokante planifikashon òf e progreso. Informenan anterior ta sugerí ku lo bai konstruí e proyekto den dos fase i ku a plania pa finalisá mei mei di 2019, pero e planifikashon aki a resultá di no ta alkansabel. 

E website di Taubco no ta dunando aktualisashon na e momentonan aki di e planifikashon, pero ta enfatisá si ku Chobolobo Plaza mester bira un sentro komersial di kalidat haltu, ku un arkitektura inspirá pa un vershon moderno di Handelskade. Taubco Management no ta deskonosí den mundu di biennan inmóvil; nan a realisá kaba Churchill Plaza i Juno Plaza.