WILLEMSTAD – Carmabi, e instituto biológiko marino Karibense, a hasi un yamada na sambuyadónan i personanan ku ta snòrkel pa ta alerta pa gutunan morto. Via nan página di Facebook e organisashon ta pidi yudansa pa kolektá informashon tokante e fenómeno resien di morto masal di piská den fondo di  laman rònt Kòrsou.

Rapòrtnan resien ta mustra riba un oumento di e kantidat di gutu morto, ku aparentemente bakterianan cyano a venená. E bakterianan aki, ku outomátikamente ta presente entre e alganan den fondo di laman, por kontiné tin biaha toksina dañino.

E toksinanan aki ta dañino pa e bida marítimo i por okashoná morto di gutunan, meskos ku otro piská ku ta konsumí e alganan kontaminá aki.

“Nos ke determiná si e kasonan di morto aki aktualmente ta forma un problema mas grandi na Kòrsou,” segun un bosero di Carmabi. Ta p’esei nos ta hasi un yamada na kada persona ku ta sambuyá òf snòrkel pa trese gutunan morto ku nan ta topa na nos instituto na Piscadera.” 

Carmabi ta konsehá pa fria e piskánan ku nan a haña mas rápido ku ta posibel i transportá nan den friu pa garantisá e kalidat di e muestranan pa investigashon. Boluntarionan, ku ta dispuesto pa yuda, por pone e piska den un djùk i tres’é na e instituto.