KRALENDIJK- Riba djamars 15 di aprel 2024 entidat públiko Boneiru i Kámara di Komèrsio i Industria Boneiru a firma un akuerdo di kolaborashon pa na un manera struktural traha huntu riba tereno di desaroyo ekonómiko di Boneiru.

Pa medio di e kolaborashon akí entidat públiko Boneiru i Kámara di Komèrsio Boneiru a krea un helpdesk, ‘Helpdesk WML – Sueldo Mínimo Legal’, pa duna sosten na empresarionan i duna nan konosementu tokante e posibel konsekuensianan di e oumento di Sueldo Mínimo Legal pa nan operashon komersial. Di e manera akí empresarionan por tuma medidanan adekuá na tempu pa loke ta trata nan operashon komersial, sin ku esaki ta kondusí na oumento eksesivo di preis.

E plan ta enserá un kampaña den medionan di komunikashon, anochinan di informashon i sosten individual via un helpdesk. Empresarionan por traha un sita ku e Helpdesk Sueldo Mínimo Legal, kaminda nan ta haña konseho di parti di un konsehero independiente. Esaki lo duna nan sosten pa nan haña un bista tokante kiko e impakto ta riba nan organisashon i kua ta e mihó manera pa antisipá riba esaki. Informashon tokante esaki ta sigui durante e dianan binidero. Relashoná ku e enkuesta a bin bon kla dilanti ku mas suministro di informashon ta nesesario tokante kiko e impakto i e konsekuensianan lo ta di oumento di e sueldo mínimo legal.

Traha brùg

‘E kolaborashon akí ta den liña ku e plan anual 2024 di Kámara di Komèrsio, Traha brùg huntu na i pa Boneiru, kaminda Kámara di Komèrsio den kolaborashon ku e diferente organisashonnan, empresanan i stakeholdernan ta stimula aktividat empresarial na nos isla’, segun direktor di Kámara di Komèrsio Phar Martha.
‘Oumento di e sueldo mínimo legal tin konsekuensia tambe pa empresanan na Boneiru. Pa medio di un kolaborashon mas estrecho ku Kámara di Komèrsio nos ta trata na brinda un mihó suministro di informashon i pa hasi posibel puntonan problemátiko visibel na tempu i den un forma mas adekuá. Huntu nos por enfrentá desafionan mas mihó, loke riba término ta na benefisio di nos tur’, segun diputado Clark Abraham.