KRALENDIJK – Djarason 5 di yüni a habri e departamentu nobo pa estranhero ofisial den Instituto Penal Hulanda Karibense (JICN). Den e prizòn sekretario di estado van der Burg a kòrta e sinta, di manera ku a habri e ala spesial ofisialmente.

Interesadonan por a sera konosí djarason ku e sèlnan nobo ku ta destiná pa estranheronan riba e isla. Por pone estranheronan pa diferente motibu den kustodia hudisial pa estranero. Den sierto situashon durante prosedura di asilo por pone un estranhero den kustodia hudisial. Tambe por pone un estranhero ku segun lei no por ta na Boneiru i no ta bandoná e isla di  su mes, den kustodia hudisial pa estranhero bou di kondishonnan. Kada sèl den e departamentu nobo tin lugá pa dos detenido. Den e sèl nan por hasi uzo di un tualet, ducha, kama ku fèn, frishidèr i un microwave.

Durante e seremonia di apertura e oradónan a enfatisá e importansia di dignidat humano, seguridat i re-integrashon dentro di prizòn. “JICN ta un instituto kompleto ku ta drei riba prinsipionan di seguridat relashonal i hustisia prosedural,” segun Toon Molleman, direktor di divishon di sistema penitensiario interino i kustodia hudisial pa estranhero. “Nos ke logra mas ku solamente represaya.” 

Trata na un manera humano 

E departamentu nobo ta spesialmente diseñá  pa kumpli ku e eksigensianan moderno di detenshon. Segun Rijksdienst Caribisch Nederland tin sufisiente espasio pa biba, bon fasilidatnan di sanitario, ventilashon i aksesibilidat pa bai den aire fresku. Segun e instansha lo tin tambe disponibel kuido médiko adekuá i guia sikológiko. Tur esaki pa laga trata e estranheronan ku yega Boneiru na un manera humano i hustu.

Den su diskurso Van der Burg a menshoná ku el a bishitá e prizòn di Boneiru kuater biaha den su funshon komo sekretario di estado. “Aki un par di siman mi no ta sekretario di estado mas”, segun van der Burg. “Apertura di e departamentu aki di bèrdat ta un logro. Mi kòmplimènt na tur ku a kontribuí na e fasilidat nobo aki”.