KRALENDIJK- Ounke ku regularmente por skucha krítika t ora ku ta trata biahenan médiko pafó di Boneiru statistiknan ta mustra ku gran mayoria di esakinan ta bai rumbo pa e islannan mas serka. Den kaso di Boneiru esaki ta Aruba i Kòrsou, mientras ku pa St. Eustatius i Saba, esaki ta pa St. Maarten. 

Esaki por lesa den e ‘The Caribbean Netherlands Health system review’ ku a wòrdu publiká resientemente.

E rapòrt ta nota ku provedónan di kuido na e islanan BES mes no por kubri tur e nesesidatnan médiko di e populashon, i ku pa e motibu aki mandamentu di pashent pa a e otro islanan di Karibe Hulandes ta un tarea importante di Zorg en Jeugd Caribisch Nederland (ZJCN).

“Mas ku 90% di biahanan médiko for di Sint Eustatius i Saba a bai pa e isla hermana St. Maarten na aña 2023, mientras ku den e kaso di Boneiru, 81,3% di e biahenan médiko a bai den direkshon di Aruba i Kòrsou”, segun por lesa den e rapòrt. 

Otro biahenan médiko ta bai den direkshon di Colombia i Hulanda. For di St. Eustatius i Saba, aparte di biahenan pa St. Maarten tin algun kaso di biahenan médiko ku ta bai Boneiru.

Pa averehe, 5.658 pashent pa aña ta wòrdu mandá  afó di e islanan BES entre 2017 i 2023 pa tratamente médiko. Durante e añanan 2020 i 2021 por a nota un bahada bast drástiko den esaki, loke segun e rapòrt ta reflehá e impakto di e pandemia di COVID-19 ku a pone limitashon serio pa loke ta trata e kantidat di pashènt ku por a biaha pa un di e otro islanan. 

Gastu

E gastunan pa biahenan médiko ta basta konsiderabel. Na aña 2023, e kostonan logístiko i médiko pa biahenan médiko a suma na 43,7 mion dòler i un promedio di 37,9 mion di dòler entre 2019 i 2022; un promedio di 16,6 mion pa dòler pa gastunan  logistiko, i un promedio di 21,3 mion dòler na gastu médiko.