WILLEMSTAD/KRALENDIJK – Tin un tenshon kresiente entre Kòrsou i St. Maarten pa like ta trata pèrmit di buelo entre Curaçao ku Sint Maarten. 

Despues di e bankarota di Jetair, Winair, ku ta operá for di St. Maarten, a pidi un pèrmit pa kondusí kuater buelo semanal adishonal. Sinembargo Autoridat di Aviacion Civil di Kòrsou (CCAA) solamente a outorisá e buelonan extra aki pa un periodo preliminar di dos siman, desviando di e petishon di Winair.

Winair a keda manera sorprendí pa e posishon kouteloso di CCAA, estando bou di impreshon ku, a base di e Protocol Multilateral pa Liberalisashon di Transporte Aéreo den Reino Hulandes, mester permití pa operá e buelonan aki sin restrikshon. Sinembargo, e asunto ta mas kompleho ku e ta parse na promé bista, ya ku Autoridat di Aviashon Sivíl di St. Maarten (SMCAA) tin kasi un aña ta tardanado ku otorgamento di un pèrmit similar pa Z Air, ku ta operando for di Curaçao i Bonaire.

E supuesta duda di SMCAA ta e hecho ku Z Air lo sirbi e ruta di Kòrsou-Sint Maarten usando avionnan ku registrashon merikano N. SMCAA ta eksigiendo un deklarashon por eskrito di sea Z-Air òf CCAA, suministrá pa Merka, kaminda Outoridat Federal di Aviashon (FAA), ta konfirmá ku e kòntròl operashonal ta serka CCAA na Kòrsou. 

Deklarashon FAA

Direktor di CCAA Peter Steinmetz a splika ABC Online Media ku en bèrdat ta kustumber pa e pais di registrashon duna un deklarashon por eskrito traspasando e kòntròl operashonal pa e pais for di kua e kompania di aviashon ta operá. “Merka sinembargo no ta hasi esaki ku ningun pais, i tampoko ku Kòrsou,” Steinmetz a splika. FAA a den sierto korespondensia ta nota sí ku Z-Air ta un kompania di aviashon ku Air Operator Certificate (AOC) di Kòrsou i komo tal ta asumí ku su operashonnan ta bou di supervishon di CCAA.

Steinmetz no ta mira motibu pa St. Maarten keda bira pa duna e pèrmitnan nesesario na Z-Air, solamente pa motibu di e falta di un akuerdo por eskrito ku Merka.

E situashon ta bira mas fèrfelu pa motibu ku e protokòl multilateral entre e islanan i Hulanda spesífikamente ta papia di ‘duna pèrmit ku un mínimo di rekesito i sin tardansa’ na kompanianan di aviashon di  e otro islanan. Esaki netamente ta lanta e pregunta si e akshonnan di SMCAA no ta nèt kontrali na loke e protokòl ta stipulá i si nan eksigensianan rasonabel, mirando ku Merca no ta sera e tipo di akuerdonan aki ku ningun pais na mundo, ku lógikamenta ta inkluí Kòrsou tambe. 

Protekshonismo

ABC Online Media a papia ku vários personan ku konosimentu di e materia den dianan tras di lomba, ku a ekspresá e opinión ku e akshonnan di SMCAA parse un intento na manera fini pa protehá  Winair mas tantu posibel. Realmente, Sint Maarten ta doño di 93% di e akshonnan di Winair i tin interes pa protehá Winair i garantisá ku e tin un posishon kompetitivo faborabel. SMCAA, naturalmente, no ta di akuerdo ku e ponensia aki.

Ta interesante tambe pa remarká ku por ehèmpel Aruba i Colombia no tin ningun problema pa Z-Air usa di avionnan registrá na Merka,  i a emití e pèrmitnan nesesario komo operadó aéreo stranhero asina ku a pidi esakinan. 

Registrashon ‘Novèmber’

Den mundo di aviashon, no ta nada straño ku aerolíneanan ta operá ku avionnan registrá na otro pais, inkluyendo Merka i tambe Aruba ku su registracion P4. Por ehèmpel, kasi 80% di e flota di Avianca tambe ta karga e registrashon merikano N (ku den mundo di aviashon ta yama Novèmber), meskos ku esnan di Z-Air. 

Direktor di Z-Air, René Winkel, no tin komprenshon pa e forma di proseder di St. Maarten. “Den práktika, nos registrashon ta nifiká ku nos mester kumpli ku e supervishon i e eksigensianan di CCAA, pero alabes nos mester mantené nos avionnan segun e normanan di FAA pa avionnan ku ta karga e registrashon N. Personalmente mi ta mira esaki komo garantia adishonal ku nos avionnan ta den kondishon optimal. Pero SMCAA ta parse di mir’é diferente.”

Korte

Djaweps ku a pasa, e kaso a bin dilanti di wes na St. Maarten, den kua Z-Air spera ku wes lo obligá SMCAA pa emití e pèrmit mesora. Ta spera un desishon riba e wisio sumario aki denter di aproksimadamente dos siman.