KRALENDIJK – Pasahero ku ya pa basta siman tabata sufri di kalor den sala di embarke na aeropuerto Flamingo, awor por spera salida di na buelo den un ambiente hopi mas kómodo, trankilo i spesialmente mas friu.

E aeropuerto aktualmente ta trahando riba vários proyekto di mantenshon, inkluso kambio di un gran parti di e sistema di èrko. E ekipo di mantenshon resientemente a sigui un entrenamientu di e kompania Sueiki pa uso di e sistema, i pa siña hasi reparashon chitkitu.  “Pasahero wardando nan buelo por hasi esei den un sala di embarke agradabel i spesialmente mas fresku.  Naturalmente, nan por skohe tambe pa sinta riba nos teras pafó ku un bista tremendo riba e pista di aterisahe” direktor di BIA, Maarten van der Scheer a bisa. 

Proyekto

E drechamentu di e sistema di èrko ta forma parti di vários proyekto den ehekushon na aeropuerto. Otro proyekto ta enserá remplaso di e lusnan riba di pista, i instalashon di un dak riba un parti di e lugá pa stashoná outo, ku lo ta kubrí ku pènel solar pa generá koriente. BIA pa algun tempu tin mehorashon di su sostenibilidat haltu riba su lista di prioridat.