KRALENDIJK – Den e último simannan Reshèrshi di Reino a kondusí un investigashon penal na komportashon di algun agentenan polisial relashoná ku aresto previo di algun sospechoso. E investigashon a resultá ku awe a detené un agente polisial di KPCN sospechá di entre otro maltrato i falsifikashon di dokumento. Den kuadro di e investigashon ku ta andando no por duna mas informashon.

Manera a indiká anteriormente, Ministerio Públiko i KPCN ta balorá pa enfatisá ku ta tuma siñalnan di posibel violashon di integridat hopi na serio i ta investigá esakinan mas aleu tambe ora ta nesesario. Atendé di un manera severo ku violashonnan di integridat semper lo tin nos prioridat. Aktuashon íntegro di polis ta na interes di tur siudadano di nos islanan pero tambe di gran importansia pa tur kolega di KPCN ku tur dia ta traha duru pa ku seguridat di nos islanan i su habitantenan.