KRALENDIJK – Diaweps atardi, Tourism Corporation Bonaire (TCB), Bonaire Hotel and Tourism Association (Bonhata) i Bonaire International Airport (BIA) a duna un resumen di e desaroyonan den e sektor turístiko di e isla den e promé seis luna di e aña.

Ounke sifranan te ku yüni di e aña aki ta positivo, tòg tin algun motibu pa prekupashon. Por ehèmpel, TCB a risibí un presupuesto signifikativamente mas abou e aña aki, poniendo ku por gasta ménos riba aktividadnan di merkadeo. Tambe, e kantidat di barku krusero ku a bishitá Boneiru den e promé mitar di e aña a baha. Den e promé seis luna di 2024, tabatin 89 bishita, kontra 108 bishita den e prome seis luna di 2023, ku ta nifiká un bahada di mas o ménos 17%.

E problema ta ku no ta trata solamente di ménos barku, pero tambe e kantidat di turista ku ta yega Boneiru riba barkunan krusero a baha konsiderablemente, di masoménos 275.000 den e promé seis luna di 2023, pa masoménos 208.000 den e promé mitar di 2024.

Sinembargo, tin tambe algun desaroyo positivo. Direktor di Bonhata, Veroushka de Windt, a bisa ku den e promé lunanan di e aña aki a logra un preis mas haltu pa kamber, kompará ku 2023.

Aeropuerto 

Direktor di aeropuerto, Maarten van der Scheer, tambe tabatin notisia positivo. Ounke ku e kantidat di buelo den e promé seis luna diaña tabata ta un poko mas abou ku aña pasá, e kantidat di pasahero ku yega na e isla a yega subí ku algu mas ku 5%. Van der Scheer a nota ku e sifranan no ta solamente relashoná ku bishitante, sino tambe ku hende ku ta biba na e isla.

Pa e segunda mitar di aña, e perspektivanan di e aeropuerto ta sigui positivo; American Airlines ta amplia e kantidat di buelonan pa Boneiru den e tempu haltu di turismo, e aerolínea ‘low-cost’ Jet Blue di Merka ta kuminsá ku buelonan for di New York den novembèr, WestJet ta reanudá e buelonan for di Canada, i Corendon ta bai kuminsá ku buelonan bou di su propio nòmber dos biaha pa siman for di novèmber.