WILLEMSTAD- Despues ku resientemente Z Air a presentá dos kaso legal kontra pais St. Maarten pa ta tardamentu den dunamentu di un permit pa buelonan pa e isla ei,  awor Winair ta presentá vários prosedimentu legal kontra Pais Kòrsou. 

E motibu pa e kasonan ta e echo ku Kòrsou te asina leu no ta ke duna permit pa buelonan adishonal di e kompania entre St. Maarten i Kòrsou. Winair ta basa su mes riba e protokòl multilateral entre e islanan i Hulanda. 

E resistensia di Kòrsou tin di haber ku e echo ku gobièrnu di Sint Maarten ta poniendo traba tambe pa Z Air ku ta operá for di Kòrsou i Boneiru. Minister Charles Cooper di VVRP a bisa promé ku pa e resiproidat ta masha importante. Segun e minister, no por ta asina ku Winair por bula liberamente entre e isla, mientras ku Sint Maarten ta manera hala pia pa duna pòrmit pa buelo pa aerolínenan di otro isla. 

Krítiko 

Na Kòrsou vários hende ta wak e aktitut di departamento di aviashon sivil di St. Maarten ku algu di deskonfiansa. Nan ta mustra riba e echo ku doño di Winair ta gobièrnu di St.Maarten, i ku ta parse manera gobièrnu di e isla ta tumando un posishon  protekshonista pa protehá e interésnan di Winair.

E kasonan lo tuma lugá respektivamente dia 25 di yüli i 2 di ougùstùs.