KRALENDIJK- Despues ku den último dianan por a nota basta diskushon entre partidonan ku ta forma parti di aktual koalishon, i esnan di oposishon, djadumingu mainta konsehal Dany Crestian (PDB) tambe a kompartí su pensamentunan.

“Ultimo siman nos por a tuma nota di algun akto di desesperashon di parti MPB/UPB i nan perito nan. Ora èks diputado Thielman [MPB] a tuma nota ku a duna despedida di su komplisénan den Direktorado di B&O, spantu a kue su kurpa. Awor e no tin hende pa skonde su fechorianan di último añanan” asina Crestian a skibi.

Tambe, Crestian ta bisa ku si ta trata di bulamentu den business class lo ta na su lugá pa tantu Din Domacasse i èks diputado Thielman puntra nan lider di frakshon di MPB den konseho insular Juni Wout ku sí ta bula den business class pa mas detaye. “Pasó ami Dany Crestian nunka ta bula den business class” Crestian a bisa.

E konsehal di PDB ta bisa ku ta ku masha furor ta intentá di bòltu e kos komosifuera ta mal kos Diputado Abraham ta hasi den e aparato. “Thielman a lubidá ku na 2022 ela kompremeté Gobiernu pa mas ku $6 mion sin esaki ta presupuestá? Thielman a lubidá ku e mester a pidi Raad pa apsolvé su aktonan eligítimo? Thielman a lubidá ku a sera 2023 ku un defisit di $3 mion doler? Thielman a lubidá ku ela presupustá $20 mion na inbershon, pero NO tin e sen ei den kaha?” ta algun pregunta ku Crestian ta hasi.

Mal Maneho Finansiero

Crestian ta sigui bisa ku si lo a kontinuá ku e maneho finansiero manera e tabata wòrdu hibá último añanan, Gobiernu di Boneiru lo a hañ’é den un situashon finsiero grave. “A spat sen pa loko riba e.o. OvO i un seniorenregeling sin maneho sano su tras. Ademas, pa 2024 a presupuestá 20 MION doler na inbershon, ku Gobièrnu di Boneiru no tin. Den e presupuesto 2024 a presentá un sifra di likides ku NO ta kuadra ku e realidat finansiero. Ku e maneho ku tabata wordu hiba lo kontinua, na fin di aña 2024 Gobiernu di Boneiru lo a bati bankarota. Esaki NO ta palabra di mi persona, no ta palabra di Diputado Abraham, pero esaki ta palabra ekspresa pa e hefe di Finansas i akountent di Gobiernu Boneiru”. Segun Crestian niun hende por kere ku èks Diputado Thielman lo ta kontentu ku e bèrdat di su mal maneho ta sali nan kla?

Por saka sèn un biaha

Crestian ta bisa tambe ku e mal maneho finansiero aki ta pone ku mester remediá esaki rápido pa por inbertí sènnan kaminda tin nesesidat den nos pueblo. “Bo por saka sèn solamente un biaha, kiermen mester sera e buraku den pipa ku ta kibrá i ta hasi desperdisio di sèn di Pueblo pa nos por kaba drecha nos kas ku ta Boneiru. Ta na su luga ku Diputado Abraham ta pone òrdu den e aparato, protehá esnan ku si ta traha di buena fe i krea e espasio pa nan por hasi nan trabou manera debe ser. Ta esei ta netamente e tarea ku Abraham a haña di Konseho Insular pa bai hasi”, Crestian a konkluí