WILLEMSTAD – Djaweps a tene e kaso hudisial ku Windward Islands Airways International (Winair) a entamá kontra Minister di Tráfiko i transporte di Kòrsou, Charles Cooper. Durante e tratamentu Winair a argumentá ku Cooper ta nenga inhustamente di duna un permit temporal pa ehekutá buelonan èkstra entre St. Maarten i Kòrsou.

Abogadonan Rogier van den Heuvel i Paul de Lange a alegá na nòmber di Winair, ku a base di e protokòl entre Hulanda i e islanan, e tin e derecho di ehekutá e buelonan sin mas. Tambe e apoderadónan a mustra riba e konsekuensianan dañino di falta di e pèrmitnan, pasobra awor lo ta difísil pa haña un lugá riba un buelo entre ámbos isla.

Na nòmber di e minister hurista Giselle Hollander a trese entre otro dilanti ku e akshon di Winair tabata prematuro. “E desishon riba e petishon di 18 di yüni 2024 (pa buelonan èkstra, red.) ta kai dentro di e término legal stipulá di 90 dia. E apelashon di Winair ta prematuro, pasobra e término di desishon no a pasa ainda”, Hollander a bisa Korte.

Den su argumentashon Hollander a indiká tambe ku no ta trata solamente di nenga òf pèrmití buelonan èkstra so, pero ku Curaçao Civil Aviation Authority (CCAA) tin tambe un tarea importante pa pèrkurá ku e merkado no ta saturá i ku por keda papia di konkurensia hustu i un funshonamentu di merkado  efektivo riba e rutanan entre e islanan.

Na nòmber di pais Kòrsou Hollander a remarká ketu ketu tambe ku ZAir, ku ta operá for di Kòrsou, tambe ta warda ainda riba un desishon di outoridatnan di aviashon di Sint Maarten pa por ehekutá buelonan for di i pa e isla ei. Mientrastantu tin un prosedura hudisial tambe ta kanando, pasobra pais Sint Maarten tin un aña kaba ta atendé esei. Ta spera un desishon den e kaso aki riba 12 di ougùstùs. Segun e hurista, ku ta spesialisá den derecho di aviashon, ku pa e motibu aki lo ta prematuro  tambe pa duna Winair un pèrmit awor aki kaba pa e yena e bashí kompletamente ku a surgi na momento di e bankarota.

Konkurensia hustu 

Asigná e frekuensianan awor solamente na Winair lo por kondusí ku despues no ta asigná buelo mas na ZAir, pasobra e ora ei lo por papia di un saturashon di e merkado. “Lo desestimá e petishon di ZAir e ora ei relashoná ku un ekseso di kapasidat. Únikamente Winair lo por operá e ruta entre Sint-Maarten i Kòrsou, lokual no ta kuadra ku promové konekshonnan aéreo duradero i konkurensia hustu”, segun Hollander.

Hollander ta remarká, podisé ta di mas bisá, ku pasaheronan tambe ta benefisiá ku konkurensia sano entre mas operadó. “Nos tur a eksperensiá kon e preisnan por desaroyá si no tin otro konkurensia disponibel riba merkado”.

Kompleho 

Despues di e tratamentu sustantivo i a tende e argumentunan di tur banda, e wes mester disidí si Winair su petishon ta atmisibel pa un mandato hudisial i kon lo mester sigui aktua den e kaso rondó di pèrmitnan ku ta bai bin i ku mientrastantu a bira kompleho.

Mientrastantu ni Winair, ni ZAir no ta benefisiá di e diferensia di komprondementu riba nivel ministerial ku a surgi entre Kòrsou i Sint Maarten, tantu kaminda ta trata eksigensianan ku SMCAA a pone pa ZAir, komo e koutela ku CCAA ta mantené na momento di otorgá pèrmit pa buelonan èkstra na Winair.