WILLEMSTAD- Z Air riba djasabra anochi a tene un reunion general pa su empleadonan pa informá nan ku mas detaye ku e plan di ekspanshon i inkorporashon di dos avion djèt Embraer-140 den su flota.

Direktor di Z Air, René Winkel a yama tur esnan presente den sala di konferensia na Kurá Hulanda bon biní, i a bisa ku ta importante pa hinter e tim di Z Air buta nan schouder bou di e proyekto. “E ekspanshon aki no ta trabou di un òf dos persona den e kompania, pero di hinter e tim. Tur nanishi mester ta den mesun direkshon pa nos ta eksitoso i pa nos por sigui krese.

Despues di e introdukshon general, direktor tékniko Ivo Oduber a duna un splikashon di e diferente fase ku e proyekto lo tin. Oduber a indiká ku e espasio di tempu ta algu ambisioso, i ku lo mester traha duru pa logra esaki.

Un parti importante lo ta e entrenamentu pa piloto, pero tambe mekániko i hende ku ta traha na tera ku e avionnan. Tambe Oduber a splika ku den a kaso aki no ta bai remplasá e avionnan di marka Saab ku e kompania ta operando kaba, pero ku e avionnan nobo ta bin riba esnan ku tei kaba. “Ke mèn realmente esaki ta un ekspanshon i nos lo bai krese, tambe den kantidat di empleado”, asina Oduber a bisa. Ku inkorporashon di e avionnan nobo ku ta bula mas lihé i ta yega mas leu, ta bai traha tambe riba ekspanshon di e ret di destinasho. Manera Oduber a splika, esaki lo bai stap pa stap i gradualmente.

Pregunta

Despues di introdukshon i splikashon di gerensia tabata tin espasio pa hasi pregunta i despues a sigui un enkuentro informal, kaminda tur presente por a sosialisá un ratu.

Winkel a bisa ku e tabata hopi kontentu ku e kantidat di empleado ku tabata tei i e forma kon e anochi a kana.