KRALENDIJK – Water – en Energiebedrijf Bonaire (WEB) ta anunsiá inisio di e siguiente fase di instalashon di iluminashon LED na Boneiru. E trabou importante aki, realisá pa WEB den enkargo di Entidat Públiko di Boneiru (OLB), lo mehorá signifikantemente iluminashon na vários parti di e isla. Un total di 1.000 iluminashon inteligente (slimme straatverlichting) nobo lo keda instalá den fase II.

Despues di un proyekto piloto eksitoso na ougùstùs 2023, den kual a instalá 625 lampi LED riba kamindanan prinsipal, WEB ta kla pa e lansamentu kompleto. E efektonan positivo ta notabel kaba pa abitantenan i outomobilistanan lokal, ku ta benefisiá di mihó visibilidat i oumento di seguridat.

E instalashon di e lampinan LED ta ser hasi pa kompanianan lokal, entre nan Installatiebedrijf Oleana (IBO NV) i D.S.G NV. E kolaborashon aki ta enfatisá e balor di envolvimentu i ekspertisio lokal.

Periodo di trabounna:

E trabounan lo tuma lugá di ougùstùs pa novèmber 2024. E barionan di Amboina, Bario Wanapa i Bario Selesie lo keda atendé promé. E promé parti di Kaya Internashonal, for di Rotònde Bonaco te ku Kaya Gilberto F Croes, tambe lo risibí iluminashon di kaya nobo.

Kiko esaki ta nifiká pa abitantenan i outomobilistanan?

E trabounan lo keda ehekutá di djaluna pa djabièrnè, entre 8:00 AM y 4:30 PM. E meta ta pa minimalisá inkumbiniensia. Ta pidi abitantenan pa tene e espasio rondó di e palu di lus liber pa ehekushon efisiente i sigur di e trabou. Ta pidi usuarionan di kaminda pa kore mas slo den áreanan unda trabounan di konstrukshon ta tumando lugá.

WEB i OLB ta spera di por brinda komunidat di Boneiru un isla mas sostenibel i sigur. E iluminashon LED nobo ta ofresé redukshon di kosto di energia i ta kontribuí na un Boneiru mas briante i sigur pa un i tur.