PHILIPSBURG – E impase entre Sint-Maarten i Kòrsou tokante e pèrmit di ruta pa ZAir a yega na un solushon pasífiko. Minister di Turismo, Asuntunan Ekonómiko, Transporte i Telekomunikashon, Grisha Heyliger-Marten, a duna e kompania di aviashon di Kòrsou ZAir pèrmit pa bula pa Sint-Maarten entrante djaweps 8 di ougùstùs  2024 te ku 31 di dezèmber 2024.

Den un karta dirigí na Rene Winkel, CEO di ZAir, Heyliger-Marten a informá ku e kompania ta pèrmití pa transportá pasahero, ekipahe i karga (inkluso pòst) riba e siguiente rutanan: Kòrsou-Sint-Maarten i visevèrsa; Kòrsou – Sint-Maarten – Santo Domingo – Kòrsou; Kòrsou – Santo Domingo – Sint-Maarten – Kòrsou; i Kòrsou – Port-au-Prince – Sint-Maarten i visevèrsa.

Lo ehekutá e rutanan aki di akuerdo ku e Protokòl Multilateral pa loke ta trata e liberashon di e transporte aéreo, ku e gobièrnunan di e paisnan dentro di Reino Hulandes a firma 12 di dezèmber 2012. E minister ta enfatisá ku mester di pèrmitnan separá pa avionnan ku ta agregá na e flota despues di emishon di e pèrmit aki.

Tambe ZAir a haña un pèrmit di ruta apart pa buelonan di ambulans entre Kòrsou, Saba i St. Eustatius pa Sint-Maarten i visevèrsa.

Na interes di e islanan 

Minister Heyliger-Marten a tuma kontakto ku su kolega di Kòrsou, Minister Cooper, i ámbos tabata di akuerdo ku e solushon aki ta na e mihó interes di habitantenan di ámbos isla.

“E akuerdo aki ta duna e personanan di Kòrsou i Sint-Maarten, pero tambe di Saba, St. Eustatius, Aruba i Boneiru, e oportunidat pa keda biaha entre nos islanan pa vários meta, manera bishita di famia, aktividatnan komersial, kuido médiko, rekreashon, eventonan deportivo i interkambionan kultural,” segun Heyliger-Marten. “Mi ta kontentu ku nos por a solushoná e asunto aki pasífiko.”