KRALENDIJK- Den oranan di mainta riba djárason 14 di ougùstùs, Kuerpo Polisial Hulanda Karibense (KPCN) a tene un kòntròl di tráfiko dirigí riba velosidat di vehíkulonan. 

E kòntròl di tráfiko a tuma lugá riba Kaya Ir. R. Statius van Eps. A midi velosidat di e vehíkulonan ku tabata aserkando ku un aparato pa midi velosidat spesial (lasergun). 

Riba Kaya Ir. R. Statius van Eps e velosidat máksimo ku ta permití ta 60 km pa ora. Durante e kòntròl a midi velosidat di un total di 10 outo i a duna 4 but pa surpasá e velosidat máksimo ku ta permití. E velosidat ku a midi tabata entre 70 pa 83 km pa ora.

Atvertensia

KPCN lo kontinuá ku e tipo di kòntròl dirigí riba velosidat aki den e próksimo dianan na diferente parti di nos isla i ta atvertí tur outomobilista pa paga tinu riba nan velosidat. Den área urbanisá (bebouwde kom), 40 km pa ora ta e velosidat máksimo permití i pafó di bebouwde kom ta 60 km pa ora.