KRALENDIJK – Kolehio Ekutivo di Bonaire, sostené pa PDB, M21 i konsehal Cyrill Vrolijk resiente a notifiká Konseho Insular pa medio di un asina yamá karta di informashon (Raadsinformatiebrief) di algun duda basta fundamental ku ta eksistí pa loke ta trata proveshon di fyul pa e isla.  

Un akuerdo di 2021 entre Bonaire i e Estado Hulandes, ku a wòrdu firmá pa vários sekretario di estado di parti di Hulanda, i na otro banda pa gezaghèber di e tempu ei, Edison Rijna, a lanta interogante serka Kolehio Ehekutivo. Entre otro tin duda ta eksistí si Rijna tabata tin e outordidat rekerí pa firma e akuerdo aki, na nòmber di Boneiru. 

E akuerdo aki, entre otro, ta práktikamente regalá e kompania propiedat di Entidat Públiko Boneiru Oil Trading Bonaire (OTB) na e kompania Bonaire Bon Transition (BBT), ku ta kompletamente den man di Hulanda. 

Pa motibu di e vários preokupashonnan aki, Kolehio Ehekutivo ke yega na un akuerdo nobo ku Hulanda, kaminda Boneiru ta keda ku e outoridat pa loke ta trata distribushon di fyul na Boneiru i pa, di e forma ei, evitá situashonnan indeseabel di monopolio di partidonan pafó di Boneiru. 

Estudio ambiental

E preokupashon di parti di gobièrnu no ta e úniko problema ku ta vilumbrando pa loke ta un terminal nobo ku lo keda konstruí banda di aeropuerto. Por skucha preokupashon di vários skina pa loke ta un asina yamá Evaluashon di Efekto Ambiental (Mileu Effect Rapportage, òf MER) ku lo no a wòrdu hasí òf ku sí a wòrdu hasi, pero kaminda lo a skonde e resultadonan di e estudio aki. 

Banda di esei, por skucha mas i mas preokupashon di parti di abitantenan den e barionan pa suit di aerouperto Flamingo, ku ta teme ku lo bin ku un parke di tanki di fyul praktikamente tras di nan kas. Hopi ta puntra kiko lógika ta tras di esaki. BBT mientrastantu a kuminsá kaba ku un destaho públiko pa yega na e terminal di fyul nobo.  

Transporte riba karetera

Un otro preokupashon di parti di Kolehio Ehekutivo ta e echo ku, ku e trahamentu di un terminal nobo suit di aeropuerto, lo mester bini un operashon grandi di transporte di fyul riba e kareteranan, pa hiba e fyul nesesario te na e sentral di elektrisidat di Contour Global ku ta keda banda di Bopec. E transporte aki, ta bini ku su  riesgonan ku algu por sosodé durante e transporte aki, i otro konsekuensianan indeseá.