KRALENDIJK – Partisipante- i trainernan a kaba ku e entrenamentu di tres dia ‘Konosé bo Límite’ riba djabièrnè 27 di sèptèmber na Boneiru. 

E entrenamentu a keda organisá pa Stichting Reclassering Hulanda Karibense den koperashon ku Rutgers, un sentro di eksperensia riba seksualidat na Hulanda Oropeo. 

Partisipantenan a siña abilidatnan nobo i konosementu pa yuda evitá ku mucha hòmber entre 12 pa 18 aña ta bolbe krusa e liña di komportashon seksual i kondukta penal. E entrenamentu a enfoká riba un manera práktiko pa mucha hòmber trata mas mihó ku relashon i seksualidat. Ku nan sertifikado, partisipantenan por apliká ‘Konosé bo Límite’ den nan trabou ku i pa hóben dentro di un kuadro hudisial.