NEW YORK/KRALENDIJK – Bonaire Human Rights Organization (BHRO) a resientemente tuma parti den e “Summit of the Future” di e Nashon Uní na New York. E representantenan, Davika Bissessar, presidente di BHRO, i James Finies, fundadó di Movemento Pa Kambio, tabata presente pa representá Bonaire.

Durante e kumbre, mas ku 100 lider mundial a bini huntu pa diskutí e “Pakto pa Futuro”, ku ta buska inklushon i pa garantisá ku ningun hende keda atras. E evento a duna BHRO e oportunidat pa pidi atenshon pa e lucha di Bonaire pa outo-determinashon i loke nan a deskribí komo e violashonnan di derecho humano ku e isla ta enfrenta.

BHRO a trese dilanti ku for di 2010 Bonaire ta sufri di despoblashon sistemátiko i ku e populashon original awor ta ménos ku 32% di e total di populashon. Nan a argumentá ku e sistema di edukashon i e idioma materno di e isla a wordu remplasá pa un idioma kolonial, ku ta kontribuí na e kolonisashon mental di e hubentut.

Outo-determinashon

BHRO a hasi yamada durante e kumbre pa akshon di e komunidat internashonal pa sostené e derecho di Bonaire pa goberná su mes, i pa pone e isla bek den e lista di e Nashon Uní di teritorio ku no ta goberná nan mes. Nan a enfatizá e urgensia di representashon justo i aksesibilidat na recurso pa garantisá e futuro di e isla.