KRALENDIJK – Riba djamars, M21 a para ketu na su tres aña di eksistensia. Tambe, riba di 4 di òktober e partido lo tene su di tres kongreso statutario anual. 

Daisy Coffie, lider di partido i frakshon, den un komuníkado di prensa ta mira bèk riba e partido riba e desaroyo di e partido, ku ta basá riba prinsipionan sosial-liberal i ta dediká na hustisia sosial, transparensia i inklushon.

“M21 a hasi un impakto positivo den Konseho Insular, tantu komo partido di oposishon komo partner di koalishon, ku atenshon pa ekonomia, edukashon i medioambiente,” segun Coffie. 

Tambe e lider di frakshon di e partido ros ta indiká ku M21 a kontribuí na introdukshon di e benefisio di WW na yanüari 2025 i e revishon di leinan di bienestar pa bestia.

Coffie ta enfatizá tambe e importansia di kooperashon ku Hulanda i e bishinan Karibense pa defende e interesnan di Boneiru. “M21 ta sigui dediká na desaroyo ekonómiko, sostenibilidat medioambiental i outonomia, ku un enfoke riba bienestar di komunidat,” segun Coffie a bisa.

Apoyo

Coffie ta gradisí e pueblo di e isla pa loke e ta deskribí komo un apoyo inkondishonal.