KRALENDIJK – Durante e reunion di Konseho Insular diahuebs 26 di sèptèmber, Veroesjka de Windt, direktor di Bonaire Hotel and Tourism Association (BONHATA), a boga pa un oumento konsiderabel di e invershonan di gobièrnu den e sektor di turismo di e isla.

De Windt a indiká ku e sektor ta e motor di e ekonomia lokal i ku e ta sostené hopi empresa i sektor na Boneiru, i ku esaki ta bai muchu las leu ku solamente e sektor hotelero. Ku esaki na mente, De Windt a ekspresá e opinion ku e presupuesto di Tourism Corporation Bonaire (TCB) lo mester subi di e 2 miyon di dòler aktual pa aña, te na un mínimo di 4.5 miyon dòler pa aña kuminsando for di 2025. Segun BONHATA, e oumento di mas ku 100% ta nesesario pa mantene Bonaire kompetitivo.

Ademas, BONHATA ta hasi un yamada na Entidat Públiko Boneiru (EPB) pa traha huntu ku Den Haag pa evitá ku e posibel oumentu di impuesto planeá for di aña 2025 no bira realidat. “Empresanan na e isla lo wòrdu afektá pisá ku e impuesto mas haltu ku Den Haag ke introdusí for di próksimo aña,” segun de Windt a bisa. Den e kuadro aki ela mustra riba e echo ku hopi empresa na Boneiru ta luchando kaba ku un oumento basta konsiderabel dor di introdukshon di un lei mínomo mucho mas haltu ku tabata e kaso antes. 

Traha huntu

“Solamente trahando huntu nos por garantisá un futuro próspero pa Bonaire,” de Windt a enfatisá. Segun BONHATA, e futuro di turismo na Bonaire ta dependé di invershonan bon balansá i dirigi, tanto di parti di gobièrnu lokal komo esun di Reino.