KRALENDIJK – Daisy Coffie, lider polítiko di M21 i lider di frakshon di e partido den e Konseho Insular, a partisipá resientemente na e Bonaire Tourism Summit, organisá pa Tourism Corporation Bonaire (TCB).

Coffie a bisa ku e ta impresioná ku e plannan presentá pa 2024-2027 i a enfatisá e importansia di invershonan di gobièrnu den turismo.

“E presupuesto di TCB a keda meskos durante hopi aña, a pesar di kompetensia i desafionan ku ta aumenta. Mi ta pidi pa mas invershonan pa fortalesé e posishon kompetitivo di Bonaire i pa por realisá e plannan stratégiko di TCB,” segun Coffie den un komunikado pa prensa djadomingu.

Sin fondonan adishonal, segun Coffie a bisa, Boneiru ta kore e riesgo di keda atras kompará ku otro regiónnan, ku por afektá e kresementu ekonómiko di Boneiru na un manera negativo. “Un investigashon resien di CBS ta mustra ku turismo ta direktamente responsabel pa 40% di e ekonomia di Bonaire, ku ta demostrá e rol krusial di e sektor,” segun e lider di e partido ros.

Diálogo

Coffie a enfatisá ku mas diálogo ta nesesario pa eliminá e preokupashonnan den e sektor di turismo. Mas presupuesto lo yuda pa mantene Bonaire atrakshon turístiko i resiliente ekonómikamente, segun Coffie.