KRALENDIJK- Kuido i Hubentut Karibe Hulandes (ZJCN) ta pidi e datonan nesesario di su aseguradonan, promé ku por risibí e karchi di kuido. Den avisonan ta hasi aseguradonan atento ku mester bini ku un formulario di dato yená i firmá pa por buska e karchi. 

Den e formulario e asegurado mester yena banda di su datonan básiko manera nòmber, fam, number di sédula i fecha di nasementu tambe un adrès di e-mail, telefon selular, telefon di kas i – loke ta mas remarkabel – duna su number di kuenta di banko.

Riba preguntanan di redakshon di Bonaire.nu pakiko mester duna un kuenta di banko no ta bini hopi informashon. Riba yamadanan di telefon hasí na e College Bescherming Persoonsgegevens BES (= Kolegio Protekshon Datonan personal BES (CPB-BES)  e kachó di warda di privasidat lokal no ta duna  informashon òf reakshon.

Ku CPB-BES por sierto no ta keda sin drumi pa motibu di e loke ZJCN a pidi ta sali na kla for di un remarke di e Sekretario di CPB-BES, Roëlla Pourier riba Medionan Sosial. “E datonan personal ku ta optené, mester sirbi un meta stipulá adelantá, determiná i hustifiká. E meta i e datonan personal optené pa esaki mester ta den balansa. Ta responsabilidat di ZJCN pa partisipá esnan konserní pakiko nan mester prosesá sierto dato personal i kua prinsipio hurídiko nan ta usa pa esaki,” Pourier ta skirbi den un reakshon riba LinkedIn, reakshonando riba remarkenan di aseguradonan ku bon mirá no ta komprondé pakiko mester di tantu informashon.

Den un otro reakshon Pourier ta remarká ku siudadanonan ta semper liber pa entregá un keho kontra un órgano, manera den e kaso aki ZJCN. Parse ku CPB-BES en todo kaso si no tin intenshon pa atendé spontaniamente ku esaki. Tambe Pourier ta bisa ku preguntanan riba e nesesidat di e datonan i e protekshon di datonan konfidensial na promé instante mester ta dirigí na ZJCN.

Outorisá?

Un eksplorashon ònlain ta parse di ta sugerí ku – en todo kaso na Hulanda Europeo – un kompania di seguro médiko ta outorisá pa pidi informashon bankario solamente si esei ta sirbi un meta konkreto, por ehèmpel  ora e asegurado mes ta paga e prima. Si ta un otro ta hasi e pagonan ei, por ehèmpel un dunadó di trabou  òf gobièrnu, e ora ei esei no ta pèrmití sin mas.

“Si un asegurado mes no ta paga prima (por ehèmpel pasobra e dunadó di trabou òf un otro hende ta hasi esei p’e) no ta nesesario pa e kompania di Seguro di Kuido pa warda e datonan bankario di e asegurado ei. E Algemene Verordening Gegevensbescherming (AVG) (= Ordenansa General Protekshon di Dato)ta disidí ku por optené i warda datonan personal solamente si tin un base legal pa esei, manera un nesesidat mará na un kòntrakt òf obligashonnan stipulá pa lei,” tin skirbí. E wega ta ku e AVG ei no ta aplikabel na Karibe Hulandes ni por parti – òf asta en apsoluto no – i tin balides solamente na Hulanda.

Difísil  

Ta parse sinembargo ku no ta dje fásil ei manera hende ta pensa pa haña un kontesta di ZJCN of RCN riba e asuntu. Por spera un kontesta riba preguntanan ku Bonaire.nu a plantia djamars promé ku 12’or di mèrdia na e funshonario di komunikashon di RCN, te djaweps numa na final di dia.