WILLEMSTAD- E fondonan di penshun di Karibe Hulandes, uní den Caribbean Pension Fund Association (CaPAs) djaweps a tene na seminario annual. E aña aki e seminario a tuma lugá na Kòrsou den sala di konferensia na hotèl Marriott. 

Tema sentral tabata desaroyon teknológiko, manera Inteligensia Artifisial, i kiko esaki ta nifiká pa fondonan di penshun i spesialmente pa e konfiansa ku partisipantenan tin de sistemanan teknológiko di nan fondo di penshun. 

Tabata tin vários oradó ku a duna presentashon, entre otro tokante uso di Inteligensia Artifisial pa mehorá servisio na kliente, pero tambe tokante uso di Inteligensia Artifisial den asuntunan manera invershon. Banda di e oportunidatnan a para ketu na e peligernan ku desaroyo teknológiko por trese kun’e. 

Interes

Na tur mas ku 200 persona a inskribí pa e seminario. Direktiva di CaPAs a keda hopi kontentu ku e interes pa partisipá na e fondo. Di esnan ku a partisipá por a skucha hopi komentario positivo tokante e oradónan, e tema i tambe e organisashon di e seminario ku a kana hopi bon.