KRALENDIJK- Pa promé biaha den un periodo hopi largu, Tourism Corporation Bonaire (TCB) a registrá un bahada konsiderabel den e kantidat di turiste ku a yega e isla. 

Sifranan preliminar di TCB ta indiká un bahada di 9,8% kompará ku e 11.951 bishitante ku a keda registrá na luna di septèmber 2023. Remarkabel ta ku e kantidat di bishitante di september 2024 no ta keda leu for di e nivel di promé ku e pandemia, mirando ku den luna di sèptèmber 2019, 10.000 bishitante a yega nos isla.

Bishitantenan hulandes a keda forma e grupo mas grandi di bishitante, esta 48% di e kantidat total di yegada ku 5182 turista. E bishitantenan merikano a representá e di dos grupo mas grandi, ku 2002 bishitante (18,6%), siguí pa 1772 bishitante for di Kòrsou (16,4%). Otro kontribushonnan importante a bini for di Aruba, Alemania, Bélgika, Brasil i

Colombia.

Un komparashon di dato di bishitante di aña 2023 ku aña 2024 ta mustra kambionan remarkabel entre e merkadonan turístiko mas importante di Boneiru. E kantidat di bishitante for di Hulanda a baha ku 10,3%, ku 5182 yegada na aña 2024, kompará ku 5776 yegada na aña 2023. E merkado merikano tambe a mira un bahada konsiderabel di 20,8%, for di 2530 bishitante na aña 2023 te 2003 bishitante na aña 2024. Kòrsou a aportá ku 1772 bishitante, un bahada di 7,2% kompará ku e 1909 bishitante di e aña anterior. E kantidat di bishitante for di Canada a baha ku 10,7%, for di 84 bishitante pa 75 bishitante. E kantidat di turista for di Alemania a baha ku 15,1%, loke ta enserá 230 bishitante na aña 2024, kompará ku 271 bishitante na aña 2023. 

Aruba

E kantidat di bishitante for di Aruba tambe a mustra un bahada konsiderabel, ku 257 bishitante na aña 2024, loke ta nifiká un bahada di 29,8% kompará ku e 366 bishitante ku a keda registrá e aña anterior.