KRALENDIJK – Djasabra último Toastmasters na Boneiru a dediká shen minüt na komunikashon i liderasgo selebrando e echo ku e organisashon Toastmasters International a kumpli 100 aña. 

E selebrashon aki a tuma lugá den un ambiente edukativo i festivo kaminda miembronan a demostrá nan abilidatnan ku a mehorá durante nan trayekto den Toastmasters. Tabatin diferente oradó ku a inspirá i motivá presentenan ku nan eksperiensianan durante nan trayektoria. E parti di tópiko di mesa no por a keda afó ku ta e parti kaminda miembronan ta haña oportunidat pa den 1 pa 2 minüt kontesta un pregunta spontaneamente. 

Tambe a rekonosé miembronan na un manera speshal i un tur Toastmaster presente a keda rekonosé ku e pin di 100 aña Toastmasters. Den Toastmaster tin diferente momentu kaminda ta rekonosé miembronan ora nan kaba un nivel òf kaba un trayekto den e sistema edukashonal di Toastmasters ku yama “Pathways”. 

Na final di anochi manera tur evento festivo Toastmastersnan a brinda pa 100 aña di Toastmasters i e mas ku 18 aña di Toastmasters na Boneiru. E brindis aki tabata na enkargo di Sr. Sherwin Pourier Distinguished Toastmaster ku e aña aki tin e funshon di Direktor di Area pa Boneiru. 

Toastmasters ta un plataforma edukativo i di sosten ku ta brinda bo e oportunidat pa desaroyá bo abilidat di papia den públiko i tambe di liderá. Boneiru ta konta ku 3 klup kual ta Flamingo Toastmasters Club, Sentebibu Toastmasters Club i Shoko Advanced Toastmasters Club. For di edat di 18 aña bo por bira miembro di un klup di Toastmasters.