KRALENDIJK – Tourism Corporation Bonaire (TCB) ta kontentu ku e atenshon mediátiko ku e buelonan nobo di Corendon entre Amsterdam i Boneiru ta trese kun’e pa e isla.

Riba invitashon di Corendon Dutch Airlines, no ménos ku 80 invitado spesial a yega e isla. Ta trata entre otro di content creator, influencer i representantenan di media ku ta bai eksperensia kiko Boneiru tin pa ofresé den término di naturalesa, kultura i eksperensianan úniko.

“Esaki ta marka un paso importante pa e konekshon aéreo di Boneiru ku Europa,” segun TCB-direktor Miles Mercera a bisa. Segun Mercera, Hulanda i e islanan hermana ta keda merkadonon hopi importante pa e isla.

Un aspekto agradable di e buelonan nobo ta ku awor residente di e islanan tin opshon adishonal pa bula bai Amsterdam.

Triangulo

Corendon Dutch Airlines ta bula dos biaha pa siman, djarason i djabièrnè, for di Amsterdam ku un parada na Kòrsou pa Boneiru. For di Boneiru sinembargo e buelo ta bai stret Amsterdam.