THE BOTTOM – Kuerpo di Bombero di Saba ta tumando pasonan importante pa mehorá e ambiente di trabou i intensifiká e kolaborashon operashonal. Resientemente e tim di maneho a lansa vários inisiativa ku ta kontribuí na tantu desaroyo di tim komo fortifikashon di seguridat riba e isla.

Na òktober, tur miembro di e tim a asistí na un entrenamentu intensivo tokante “Bullying na Trabou.” E entrenamentu aki a enfoká riba rekonosé, prevení i atendé komportashon indeseabel aktivamente. Un ambiente di trabou respetuoso ta krusial pa prepará bomberonan optimalmente pa nan trabou yená ku reto i ku ta salba bida.

Banda di esaki Komandante General Thijs Verheul i Komandante Lokal Julio Every a bishitá gobièrnu lokal di Saba. Durante e bishita aki nan a hiba kombersashon ku gezaghèber Jonathan Johnson i ku e hefe di e departementu di Órden i Seguridat Públiko. E finalisashon eksitoso di e entrenamentu di komandante dor di tres miembro di e tim di Saba, e plan anual pa 2025 i e fortifikashon di kolaborashon ku gobièrnu lokal tabata riba agènda. E bishita di trabou aki ta enfatisá e determinashon di e kuerpo pa garantisá i mehorá e seguridat di e komunidat na Saba pa medio di kolaborashon estrecho ku partnernan lokal.

Kompromiso

Ku e inisiativanan aki, Kuerpo di Bombero di Saba ta konfirmá su kompromiso kontinuo pa tantu fortifiká su tim komo optimalisá kolaborashon ku outoridatnan lokal, oumentando mas ainda e seguridat i resiliensia di e komunidat.