Kralendijk- Refnan rònt mundu ta bou di nivelnan kresiendo di peliger kousá pa preshon inkluso ekseso di piskamentu, fluho di sedimento i polushon ku ta bini di desaroyo di zonanan na kosta, turismo ku no ta duradero i kambio di klima (Jackson et al. 2014).

Den e área di Karibe, e promedio di presensia di koral duru entre 1977 pa 2010 a baha di 50% te 17% anto e region ta pasando den un fase di refnan ku ta bou di dominio di alga (Gardner et al. 2003, Jackson et al. 2014). Boneiru su promedio di koral duru riba e barika di ref ainda ta komparativamente haltu na 20-24% (De Bakker et al. 2017).

Maneho di refnan di koral na Boneiru ta importante, no solamente pa balornan di medioambiente, estétika i di kultura, pero tambe pa motibu ku por lo ménos un terser parti di e isla su Produkto Doméstiko Brutu (“Gross Domestic Product” (GDP) ta generá pa turismo i 50-70% di su ekonomia ta dependé direktamente òf indirektamente di turismo (DEZA 2008, IUCN 2011, Schep et al. 2012).

Sondeo

Personal di STINAPA Bonaire a investigá e gravedat di blikiamentu di koral na 10 sitio na kosta parti pabou di bientu na Boneiru ku Klein Bonaire, for di 2016-2020, kada aña na luna di novèmber òf kuminsamentu di desèmber. E sitionan pabou di bientu tabata di nort bai sùit Playa Funchi, Rei Willem Alexander No-Dive Reserve (a kontinuashon indiká komo RWA Reserve), Karpata, Oil Slick Leap, Reef Scientifico, Kas di Regata, Invisibles i Vista Blue; e sitionan na Klein Bonaire di pariba bai wèst ta Ebo’s Special i Mi Dushi.

E refnan di Boneiru ta sigui mustra ku nan tin un fleksibilidat haltu pa problemanan manera temperatura haltu na superfisie di laman (“SSTs”). Sinembargo, e preshonnan riba ekosistemanan i partikularmente refnan di koral ta oumentando na un grado sin presedente. Parke Marino Nashonal Boneiru ta na peliger,  debi na temperatura haltu na superfisie di laman (SSTs) ku kambio di klima, pero tambe daño kousá pa aktividat di turismo ku no ta duradero, polushon for di desaroyo di zona di kosta, lèkmentu di awa di kloaka ku no a prosesá i fluho di áwaseru ku ta kore bai laman sin kontrol.. Pues ta keda obligatorio pa nos kontinuá ku monitoreo di aserka i manehá fleksibilidat di ref. Miéntras ku nos no por manehá e kousanan di eskala global pa blikiamentu di koral, nos mester hasi empeño na nivel lokal pa protehá e salubridat di e refnan di Boneiru di manera ku nan ta keda fleksibel en bista di e futuro disturbionan.

Oumento

Segun Roxanne Fransisca, biólogo marino na STINAPA “Eventonan di blikiamentu di koral masalmente ta parse di ta oumentando na frekuensia, no solamente na nivel global, pero tambe den Karibe. For di momentu ku a inisiá ku monitoreo na 2016, 2020 tabata e aña mas malu pa blikiamentu ku 61% di koral bou di investigashon tabata afektá.

Afortunadamente na e profundidat ku ta hasi investigashon no a opservá mortalidat di koral durante e monitoreo. Monitoreo despues a indiká ku mayoria di koral ta rekuperá di e evento di blikiamentu akí. Miéntras ku e refnan di Boneiru den e último añanan a mustra tendensia positivo di fleksibilidat, e kantidat di disturbio tambe ta oumentando. Futuro eventonan di blikiamentu masal ta práktikamente sigur: kon nos koralnan lo reakshoná riba e eventonan akí lo dependé seguramente di e desishon ku nos ta tuma awor i den futuro serkano. Ta importante pa nos move pa dilanti di forma duradero i segurando ku ta tene kuenta ku naturalesa ora ta diskutí e desaroyo di nos isla, pa nos por duna nos ref di koralnan e mihó chèns di sobrebibí.”

---

Lesa tambe:

• 
  Thuersten Winklaar ta bringa pa e título di Kampion Hulandes na Den Haag
• 
  Prevení Zika, Dengue i Chikungunya
• 
  Zulay Nahr ta kompartí alegria di Pasku ku famianan den nesesidat na Boneiru 
• 
  Winair i KLM reintrodusí akuerdo di kódigo kompartí
• 
  Komishon Herensia Kultural ke protekshon pa identidat di Dia di Rincon