WILLEMSTAD- Djárason 6 di óktober, seis agente di Kuerpo Polisial Kòrsou (KPC) den e investigashon “Outpost” a presentá den Korte di Promé Instansia na Kòrsou. Nan ta wòrdu sospechá di a hasi nan mes kulpabel na robo for di bibienda òf intentento di esaki, falsifikashon di prosès verbal i abuzo di outoridat komo amtenar.

Den e periodo di 16 pa 18 di sèptèmber 2020, e sospechosonan tabata traha nan seis huntu den un tim. Nan a kore bai seis diferente adrès na unda – según nan propio deklarashon – nan tabata sá ku tin hende ta biba ku antesedente òf ku por wòrdu ligá na droga. Na e adrès nan aki, nan a mustra un órden falsu pa drenta i seguidamente a listra e kas. Fiskal ouksiliar ni mèldkamer no tabata envolví.

Ora a haña plaka òf droga, a kwe esaki bai kuné. Imágenan di kámara di e listramentu, si esaki tabata presente, a wòrdu destruí. E habitantenan no a keda detené i plaka i droga ku a wòrdu konfiská no a keda prosesá según prosedura di konfiskashon manera preskribí den e instrukshon di trabou di e Tim Finansiero. E sèn a wòrdu repartí entre e agentenan. Na momento ku e entradanan i listramentu di e bibiendanan a sali na kla, esakinan a keda deskribí den un prosès verbal di lokual a topa kuné, pero kontrali na lokual ku a sosodé. Esaki a keda firmá pa tur seis verbalisante.

Investigashon

E investigashon “Outpost” a wòrdu ehekutá dor Buro di Asuntunan Interno (BIZ) di Kuerpo Polisial Kòrsou bou di responsabilidat di Ministerio Públiko di Kòrsou. BIZ a hasi un investigashon ekstènso. Ministerio Públiko a indiká durante e seshon den Korte ku ta di hopi preokupashon ora ku un agente polisial mes ta den Korte komo sospechoso. Esaki no ta bon pa e konfiansa den polis. Pero dor di a investiga e kaso aki a fondo, KPC a demonstrá ku nan tin e kapasidat pa limpia nan organisashon. Esaki ta hopi importante pa e konfiansa den e estado di derecho.

Pa motibu di limitashon pa ku COVID e kaso a wòrdu separá den dos parti. E kaso kontra B. R. i J a keda tratá den su totalidat. Ministerio Públiko a demandá un kastigu di prizòn di 4 aña di kual 2 aña kondishonal pa B., 3 aña di kual 2 aña kondishonal pa J., i 240 ora di trabou di tarea ku 2 aña di kastigu di prizòn kondishonal pa R. E último demanda ta diferensiá di e otronan pa motibu ku e sospechoso desde un prinsipio di su propio boluntat tabata habrí tokante e kaso.

A kuminsa trata e kasonan kontra di Tj, O i D, pero lo sigui ku esakinan dia 18 di òktober próksimo. Hues lo dikta sentensia di tur kaso dia 22 di novèmber 2021.