KRALENDIJK- Aeropuerto Flamingo den luna di novèmber lo kuminsá deliberashon ku vários partido, den su buskeda di finansiamentu pa realisá ekspanshon di e falididatnan. Entre otro lo papia ku partidonan privá, bankonan i fondonan di penshun, asina direktor interino, Jos Hillen ta splika.

Segun Hillen, ehekushon di e asina yamá Masterplan ta importante. “Nos mester sigui mehorá seguridat di e aeropuerto. Entre otro nos tin mester di mas lugá pa stashoná avión, na un distansia mas grandi di e pista ku ta e kaso awor aki”. E direktor ta bisa ku esaki ta un rekomendashon tambe di Inspekshon i Aviashon i Medio Ambiente (ILT) na Hulanda. 

Segun Hillen tin mas motibu dikon ehekushon di e plan ta birando urgente. “Nos tin falta di kapasidat pa loke ta traha e fluho di pasahero, ku hopi biaha ta resultá den reinan muchu largu”. BIA mester prepará tambe pa e kresementu den tráfiko ku ta premirando pa e añanan benidero.

Akuerdo

Segun Hillen, e ambishon ta pa por sera un akuerdo di prinsipio ku tur partido involví. Despues di esei, por kuminsá ku un plan di ehekushon, ku tur prosedura i komunikashon ku esei ta trese kun’é. “Después di esaki por kuminsá ku e ehekushon di e Masterplan mes”. 

E enfoke riba e plan di ekspanshon, no ta nifiká ku e aeropuerto por sinta ketu awor aki. “Nos ta tumando vários medida riba termino kòrtiku. Asina lo ekspandé e sala di yegada ku masomenos 30%. Banda di esei lo bin sistema mas grandi pa transporte di maleta i nos ta bai traha un dak kaminda pasehero por para warda, pa nan no para den solo. 

Fèn

Resientemente, BIA a instalá dos fèn enorme den e parti kaminda pasahero te chèk in pa nan vuelo. Kada un tin un hanchura di 7.2 meter. “Esaki ta nifiká mas komodidat pa nos pasaheronan, pero tambe pa e empleadonan ku ta atendé e pasaheronan aki, asina Hillen a bisa.