KRALENDIJK – Djamars 9 di novèmber tabatin entrega festivo pa studiantenan di MBO ku ta sigui e materia opshonal nobo pa Divemaster. Seis studiante di Sport en Bewegen a risibí nan Open Water i Advanced Open Water na Buddy Dive. Esaki ta e promé stap den direkshon di un diploma di sektor komo Divemaster. 

‘Na Boneiru tin hopi demanda pa Divemaster (Guia di buseo) i instruktor di sambuyamentu. Den e tereno di trabou nos ta tende hopi biaha ku ta difísil pa yena e funshonnan akí lokalmente’, Daan Kleinbussink, lider di tim Sport, Horeca en Beveiliger (Deporte, Horeca i Siguridat)ta bisa. Pa e motibu ei, kuminsando e aña eskolar akí, a agregá e materia opshonal Divemaster na e estudio Sport en Bewegen (Deporte i moveshon). Despues di finalisá e estudio, no solamente e studiantenan tin un diploma MBO rekonosé, pero tambe un diploma di e sektor. Ku esei nan por kuminsá traha dirèkt komo Divemaster. 

A organisá e materia opshonal den kolabrashon estrecho ku Buddy Dive. E personal ta guia e studiantenan ku mashá dedikashon. ‘Komo ku e demanda pa yena e posishonnan akí lokalmente ta bini direktamente for di e sektor, nos ta mira ku e instruktornan ta entrená e grupo akí ku hopi pashon i rekonosementu’ Kleinbussink ta sigui. Di e manera akí MBO Bonaire ta konektá kada bes mihó ku merkado laboral: ‘Bon pa e studiantenan i pa e isla!’

E periodo benidero e studiantenan ta kore stazje. Despues nan ta sigui ku e parti di Rescue duiken (Sambuyadó di reskate). Na final di siguiente aña eskolar nan ta Divemaster, ku e kantidat mínimo di dùik nesesario inkluí. E or’ei nan tin e papelnan korekto pa mundialmente organisá i guia sambuyamentu ku turista.

Pa mas informashon tokante e estudio Sport en Bewegen, òf un di e otro estudionan MBO, mira www.mbobonaire.com