KRALENDIJK- Despues ku Gobièrnu djaweps atartdi a anunsiá i mesora a hala bèk aden su komunikado pa subida di preis di gasoline, riba djabièrne a bolbe anunsiá e preisnan nobo, ku lo drenta na vigur di 18 di novèmber awor. 

Gobièrnu ta skibi tambe ku e espektativa ta, ku den e periodo binidero e tarifanan lo sigui subi. Motibu di esaki ta prinsipalmente pasobra no a inkluí e asina yamá ‘Fuel supply guarantee – garantia di suministro di kombustibel’ kompletamente den e tarifanan di aña pasá ainda.  

Rekargo

E provishon akí ta e rekargo riba preis di kombustibel komo konsekuensia di e situashon na refineria di Korsou. Pa motibu ku na Kòrsou pa basta tempu kaba no tin operador, pero e refineria sí tin ku keda parsialmente operashonal pa suministro di kombustibel na Kòrsou i Boneiru, ta asigná e gastunan èkstra akí na e kombustibelnan akí. 

E rekargo aktual na Kòrsou ta 12,53 sèn di dòler pa liter di gasolin òf disel, pero durante aña pasá esaki tabata hopi mas haltu ainda. Na e momentu akí Entidat Públiko Boneiru ta investigá kua rekargo mester kalkulá den e tarifanan pa Boneiru. Pa no kana mucha atras ku pago di e rekargo akí i pa prevení ku den futuro lo tin un oumento grandi di preis, entrante 18 di novèmber lo kalkulá un rekargo di 5 sèn di dòler pa liter di gasolin òf disel. 

Tambe Entidat Públiko Boneiru ta investigá te kon leu mester adaptá e márgennan na Boneiru. E preis nobo pa un liter di gasoline, for di día 18 di novèmber lo bira 1 dòler ku 40 sèn. Esaki ta un subida si 16 sèn kompará ku e preis aktual. 

Gas

Pa straño ku ta zona, lo no tin subida pa preis di bòter di gas. Un bòter grandi ta keda kosta 51 dòler ku 92 sèn. Un bòter chikí lo sigui kosta 11 dòler ku 3 sèn.