WILLEMSTAD – Djamars 9 di novèmber último a lanta ‘Curaçao Fintech Association’, CFA, na ofisina di Notario Fung-A-Loi i Samander. 

CFA a keda establesé entre otro pa aktua komo un partido outorisá i ‘sparring partner’ pa Banko Sentral di Curaçao i Sint Maarten (CBCS) i otro partidonan di interes relevante den e sektor di fintech i formanan, solushonnan di pago inovativo. 

Tèknologia Finansiero, Fintech, ta referí na integrashon di tèknologia den produkto i servisionan finansiero ku ta ofresé un eksperensia atraktivo pa e usuario. CFA su mishon ta pa yuda krea e ambiente i kondishonnan nesesario ku ta kondusí na stimulá i fasilitá solushonnan i formanan di pago inovativo na Kòrsou i den region, ku ta algu hopi nesesario den e mundu di awendia. 

Kompania

E asosashon a keda fundá dor di kuater kompania lokal di fintech: Profound, IBIS Management Associates N.V., Ictual i CX Pay. Tur otro kompania di fintech òf ku ta relatá na fintech por bira miembro di e Asosashon di fintech CFA.