ORANJESTAD- Aruba Airport Authority N.V. na nòmber di Dutch Caribbean Cooperation of Airports (DCCA), lo organisá un evento internashonal di 1 siman yamá “Sustainable Air Transportation Event” na Aruba na Novèmber 2022. 

Durante e siman aki, DCCA lo presentá alternativanan di transporte aéreo enfoká riba futuro pa asina mehorá konekshon entre e islanan di Karibe Hulandes. E ophetivo di esaki ta pa informá i familiarisá e komunidat ku e solushonnan ku tin aktualmente i pa kuminsá kombersá riba e diferente opshonnan pa aviashon sosteníbel ku representante di kompania-, partner-, den aviashon, instituto-, den edukashon, instituto di estudionan, gobièrnu-, konsùltent, inversionistanan i tur otro hende ku por ta interesá den e tópiko.  

NLR

Konhuntamente ku Royal Netherlands Aerospace Centre (NLR), DCCA lo trese e “NLR two-seater electric aircraft” for di Europa pa e evento aki, pa ehekutá diferente buelo di prueba for di Aeropuerto di Aruba. 

Un grupo di studiante den region i kompanianan lokal ku ta interesá, lo tin e oportunidad pa traha riba e preparashonnan, armamento i desarmamento di e avion i na mes momento e komunidad lo tin e oportunidat di bishita e avion pa asina risibí un splikashon riba e operashon-, benefisio-, i retonan. DCCA ta den kontacto ku autoridatnan korespondiente pa asina realisá e vishon den Reino Hulandes, trese konosimentu i definí kon pa sostené DCCA su inishativa.