KRALENDIJK/WILLEMSTAD- Despues di e último suavisashon di medidanan rondó di COVID-19, ya no tin mester di tèst di PCR, ni di antígeno ora di bula entra Kòrsou i Boneiru. Boneiru for di siman pasá a suavisá su reglanan. E siman aki Kòrsou tambe a sigui ku fleksibilisashon.

Loke no ta kompletamente kla ainda, ta si e medida na banda di Kòrsou ta konta ámbos pa hende bakuná i no-bakuná. Na banda di Boneiru i Aruba, e abolishon di e obligashon pa tèst ta apliká solamente pa hende ful bakuná. Pa djabièrnè ta spera mas klarifikashon riba e punto aki.

Banda di e echo ku no mester hasi tèst mas promé ku e biahe, awor a abolí tambe e tèst antígeno ku pasaherona mester a hasi tres dia despues di a yega Kòrsou. E abolishon di e rekesito di tèst promé ku biaha ta bálido pa biaheronan for di islanan BES, i for di Aruba, Kòrsou i Sint Maarten.

Biaheronan ku ta yega for di otro destinashon, ainda si mester sigui hasi e PCR-test promé ku biaha. Pero pa nan tambe a kita e tèst riba e di 3 dia despues di yegada.

Impulso

Ku esaki ta spera ku e tráfiko aereo, ku a kai hopi entre e islanan den último tempunan aki, lo bai rekuperá i normalisá bèk.