KRALENDIJK – Alfredo Koolman a anunsiá ku for di 5 di mei 2022 e lo renunsiá na su kargo komo Direktor General (CEO) di WEB Bonaire. E ta regresá Aruba, e isla kaminda el a nase.

Hunta di komisario a tuma nota di e desishon di Koolman i ta enfatisá ku el a desplegá un papel importante den kresementu di e organisashon.

“Durante di e último 9 añanan mi a disfrutá trahando na WEB Bonaire N.V kaminda nos a logra hopi komo organisashon i awor mi por mira bek ku satisfakshon, mi añanan na WEB. Tin untempu pa bini i tin un tempu pa bai i e tempu pa bai a yega pa ami. Masha Danki”, Koolman ta bisa.

Hunta di komisario ta yama danki na Koolman pa e 9 aña nan ku e la duna WEB Bonaire i pa e éksitonan ku e la alkansá. Koolman a krea un ambiente di trabou agradabel i inspiradó na WEB Bonaire.

Huntu ku e team ehekutivo i personal di WEB, Koolman a inisiá i implementá un reorganisashon importante na 2013. E tabata e motor tras di proyektonan grandi di WEB, manera e planta nobo di awa di bebe, e tanki di awa nobo na Seru Largu, e implementashon i reparashon di tuberianan di irigashon i reparashon di e planta di awa di kloaka (RWZI), e kontratonan ku Contour Global i e strategia di WEB 2025 ku ta kontené e plannan pa e transishon energétiko pa Boneiru.

Hunta di komisario lo deliberá riba e remplaso di Koolman pa WEB Bonaire.