Kralendijk- E gastunan pa karentena sentral (obligatorio) pa biaheronan ku ta yega Boneiru for di Amerika Latina, Sür Afrika i Gran Bretaña lo ta por lo ménos 266 dòler pa 2 persona den un kamber. E preis por varia basá riba eskoho di hende, ku kuantu hende ta keda den kamber.

E lokalidat pa e karentena ta na Buddy Divi, hotèl ku tin eksperensia tambe ku karentena obligatorio ora a implementá aña pasá entre aprel ku yüni 2020.

Promé ku biaha pa Boneiru e biaheronan en kestion mester pidi presentá prueba di tèst i tambe prueba di pago promé ku risibí outirisashon pa biaha. E outrisashon mester pidi minimalmente 72 ora promé ku yegada na Boneiru.