The Bottom, Saba- Na Saba un grupo di militar hulandes a yuda subi material i ekipo pa lanta un stashon pa monitoriá posibel aktividat volkániko na e isla.

E trabou ta sosodiendo bou di guia di Koninklijk Nederlands Meteorologisch Instituut (KNMI) ku ta enkargá ku e programa di monitoriá kalke aktividat volkániko.

Loke ta remarkabel ta ku e stashon ku lo monitoriá e aktividat volkániko ta funshoná kompletamente independiente, dor di usa panelnan solar pa generá elektrisidat. E koperashon tabata nesesario pa por subi e material i ekipo na lugánan ku no por yega di ningun otro manera. Entre otro mester a subi un kantidat basta grandi di saku di semènt ku tin mester pa por konstruí e stashon.

Agradesido

Gezaghèber Jonathan Johnson a pasa wak e trabounan di e militarnan i a yama nan danki pa nan aporte. E trabou di monitoriá posibel aktividat volkániko a haña èkstra signifikashon, awor ku un vokan aktivo na St. Vincent ta kousando un daño enorme. Dor di monitoriá aktividat e volkan La Sufrière a logra evakuá hopi hende for di e isla, promé ku erupshon a tuma lugá.